அகநானூறு

பத்துப் பாட்டுக்களில் ஐந்தாவது முல்லைப் பாட்டு, காவிரிப் பூம்பட்டினத்துப் பொன் வாணிகனார் மகனார் நப்பூதனார் பாடியது.

நற்றிணை

எட்டுத்தொகை நூல்களில் முதலாவதாக இடம்பெற்றுள்ள நூல் ‘நற்றிணை’. ‘நல்’ என்னும் அடைமொழியும் அகப்பொருள் ஒழுக்கத்தைச் சுட்டும்

குறுந்தொகை

பத்துப்பாட்டுக்களில் இரண்டாவதான பொருநர் ஆற்றுப்படை,சோழன் கரிகாற்பெருவளத்தானை முடத்தாமக் கண்ணியார் பாடியது.

ஐங்குறுநூறு

பத்துப் பாட்டுக்களில் மூன்றாவதான சிறுபாணாற்றுப்படை, ஒய்மான் நாட்டு நல்லியக்கோடனை இடைக்கழி நாட்டு நல்லூர் நத்தத்தனார் பாடியது.

கலித்தொகை

பத்துப் பாட்டுக்களில் நான்காவதான பெரும்பாணாற்றுப்படை, தொண்டைமான் இளந்திரையனைக் கடியலூர் உருத்திரங் கண்ணனார் பாடியது.

பதிற்றுப்பத்து

பத்துப் பாட்டுக்களில் ஆறாவதான மதுரைக்காஞ்சி, தலையாலங்கானத்துச் செரு வென்ற பாண்டியன் நெடுஞ்செழியனை மாங்குடி மருதனார் பாடியது.

புறநானூறு

பத்துப் பாட்டுக்களில் ஏழாவதான நெடுநல்வாடை, பாண்டியன் நெடுஞ்செழியனை மதுரைக் கணக்காயனார் மகனார் நக்கீரனார் பாடியது.

பரிபாடல்

பத்துப் பாட்டுக்களில் எட்டாவதான குறிஞ்சிப்பாட்டு, ஆரிய அரசன் பிரகத்தனுக்குத் தமிழ் அறிவித்தற்குக் கபிலர் பாடியது.

அகநானூறு: 017

களிற்றியானை நிரை


களிற்றியானை நிரை

சீறடி வல்ல கொல்‌!

பாடியவர்‌ : கயமனார்‌.
திணை : பாலை.
துறை : செவிலித்தாய் கூற்று - மகளைப்‌ போக்கிய செவிலித்தாய்‌ கூறியது.

(செல்வமாக வளர்ந்த கன்னி, இற்செறிப்பையும்‌ கடந்து, காவலனுடன்‌ சுரத்து வழியே சென்றனள்‌. “அவள்‌ அடிகள்‌ அந்தப்‌ பாதைவழி நடக்கவும்‌ வல்லதோ” என்று ஏங்கித்‌ துயருறுகிறாள்‌, அவளைப்‌ பேணி வளர்த்த செவிலித்‌ தாய்‌. தாய்மையின்‌ பாசமும்‌, காதலின்‌ சக்தியும்‌ புலப்படத்‌ தெளிவுபடுத்தும்‌ பாடல்‌ இது.)

வளம் கெழு திரு நகர்ப் பந்து சிறிது எறியினும்,
இளந் துணை ஆயமொடு கழங்கு உடன் ஆடினும்,
'உயங்கின்று, அன்னை! என் மெய்' என்று அசைஇ,
மயங்கு வியர் பொறித்த நுதலள், தண்ணென,
முயங்கினள் வதியும் மன்னே! இனியே . . . . [05]

தொடி மாண் சுற்றமும் எம்மும் உள்ளாள்,
நெடு மொழித் தந்தை அருங் கடி நீவி,
நொதும லாளன் நெஞ்சு அறப் பெற்ற என்
சிறு முதுக் குறைவி சிலம்பு ஆர் சீறடி
வல்லகொல், செல்லத் தாமே கல்லென . . . . [10]

ஊர் எழுந்தன்ன உரு கெழு செலவின்,
நீர் இல் அத்தத்து ஆர் இடை, மடுத்த,
கொடுங் கோல் உமணர், பகடு தெழி தெள் விளி
நெடும் பெருங் குன்றத்து இமிழ் கொள இயம்பும்,
கடுங் கதிர் திருகிய, வேய் பயில், பிறங்கல் . . . . [15]

பெருங் களிறு உரிஞ்சிய மண்அரை யாஅத்து
அருஞ் சுரக் கவலைய அதர் படு மருங்கின்,
நீள் அரை இலவத்து ஊழ் கழி பல் மலர்,
விழவுத் தலைக்கொண்ட பழ விறல் மூதூர்,
நெய் உமிழ் சுடரின் கால் பொரச் சில்கி . . . . [20]

வைகுறு மீனின் தோன்றும்
மை படு மா மலை விலங்கிய சுரனே?
- கயமனார்.

பொருளுரை:

செல்வம்‌ பொருந்திய அழகிய மாளிகையிடத்தே, சிறிது நேரம்‌ பந்து எறிந்து ஆடினாலும்‌, தன்னொத்த தோழியராகிய இளையபெண்கள்‌ கூட்டத்துடன்‌ ஒருங்கிருந்து சிறிது நேரம்‌ கழங்கு ஆடினாலும்‌, “அன்னாய்‌! என்‌ உடல்‌ தளர்கின்றது!” என்று கூறித்‌ தளர்பவள்‌ எம்‌ மகள்‌. வியர்வு அரும்பி நிறையும்‌ நேறியினளாகத்‌, தண்ணென்று எம்‌ மேனி குளிர, வாஞ்சையுடன்‌ அந்நிலையே வந்து எம்மைக்‌ கட்டியும்‌ கொள்பவள்‌! அங்ஙனம்‌ அவள்‌ வாழ்ந்த மென்மையெல்லாம்‌ கழிந்ததே!

இப்பொழுதோ, தொடியணிந்து மாட்சியுற்ற தன்‌ தோழியரையும்‌, எம்மையும்‌ நினையாதவளாயினாள்‌! மிக்க புகழினை உடைய தந்தையின்‌ கடத்தற்கரிய காவலினையும்‌ எப்படியோ கடந்து சென்றாள்‌!

நீர்ப்பசையற்ற சுரங்களின்‌ அரிய இடங்களிலே, கொடுமையான அடிக்குங்‌ கோல்களையுடைய உப்புவாணிகர்‌, மேற்செல்லாது நின்ற எருமைக்கடாக்களை அடித்து உரப்பி ஓட்டுகின்ற தெளிவான ஒலிகள்‌, ஊர்‌ ஒருமிக்கத்‌ திரண்டு எழுந்தாற்போன்ற ஆரவாரத்துடன்‌ கேட்கும்‌. அவை நெடிய பெரிய மலையிலே எதிரொலி உண்டாக வந்து இசைக்கவும்‌ செய்யும்‌. பக்க மலைகள்‌, கடுமையான கதிரவனின்‌ கதிர்கள்‌ தாக்கி முறுகிய மூங்கில்கள்‌ அடர்ந்தனவாக விளங்கும்‌. தம்‌ உடலிலே சேற்றினைப்‌ பொருந்திய பெரிய களிறுகள்‌ உரசுதலால்‌, காய்ந்த மண்ணைப்‌ பொருந்தியவாக விளங்கும்‌ அடிமரங்களுடன்‌ யாமரங்கள்‌ தோன்றும்‌, கவர்த்த வழிகள்‌ பலவற்றையுடைய, கடத்தற்கு அரிய சுரம்‌ அது. அதன்‌ பக்கங்களிலே, நீண்ட அடிமரங்களை உடைய இலவரமரத்தின்‌ முதிர்ச்சிமிக்க பலவாகிய பூக்கள்‌, விழாவினை மேற்கொண்ட பழைய அற்றலையுடைய முதிய ஊரிலே ஏற்றிவைத்த நெய்பெய்த விளக்குகளின்‌ சுடர்‌ தெரித்து விழுவதுபோலக்‌ காற்றுப்‌ பொருதலால்‌ சிதறி வீழும்‌. மரத்தில்‌ பூக்களும்‌ மிகச்‌ சில வாகிப்போம்‌. விடியற்காலத்துத்‌ தோன்றும்‌ விண்மீன்களைப்‌ போல அவை பின்னர்‌ அருகித்‌ தோன்றும்‌. மேகங்கள்‌ பொருந்தும்‌ பெருமலைகள்‌ குறுக்கிட்டுக்‌ கிடக்கும்‌ அத்தகைய சுரநெறியிலேயும்‌ அவள்‌ நடந்து சென்றனளே!

ஏதிலாளனான அவள்‌ காதலன்து நெஞ்சத்தைத்‌ தனக்கே உரியதாகப்‌ பெற்ற, என்‌ சிறிய மூதறிவுடைய மகளது, சிலம்பு விளங்கும்‌ சிற்றடிகள்தாம்‌, அவ்வழிச்‌ செல்லுவதற்கும்‌ வல்லனவாமோ? ("ஆகாவே" என எண்ணி நைந்தது இது.)

சொற்பொருள்:

9. சிறுமுதுக்‌ குறைவி - பருவத்து இளையளாயினும்‌ அறிவினாலே மிகுந்திருப்பவள்‌. 17. உரு - உட்கு. 13. தெழித்தல்‌ - உரப்புதல்‌. 12. மடுத்த - போகாது சண்டித்தனம்‌ செய்த. 13. பகடு - எருமைக்‌ கடா. 14. இமிழ்‌ - இசை. 15. பிறங்கல்‌ - மலைப்பக்கம்‌. 18. ஊழ்கழி - முறைமை மிகுந்த.

விளக்கம்‌:

பந்தாடுதலும்‌ கழங்காடுதலும்‌ தமிழகச்‌ சிறுமியர்‌ ஆடும்‌ விளையாட்டுக்களாம்‌. அதற்கே உடல்‌ வருந்திற்று என்பவள்‌, எங்ஙனம்‌ போயினளோ எனப்‌ புலம்புகிறாள்‌. “பகடு மடுத்த நெறி, கடுங்கதிர்‌ வேய்‌ திருகிய நெறி, மண்‌ அரை யாத்த நெறி, கவலையை அதர்படுநெறி, இலவத்துப்‌ பன்மலர்‌ கால்பொரச்‌ சில்கிய நெறி” என, வழியின்‌ வேனற்கொடுமையைக்‌ கூட்டி உணர்க.