முழவு முதல் அரைய தடவு நிலைப் பெண்ணைக்
கொழு மடல் இழைத்த சிறு கோற் குடம்பைக்
கருங் கால் அன்றிற் காமர் கடுஞ்சூல்
வயவுப் பெடை அகவும் பானாட் கங்குல்,
மன்றம் போழும் இன் மணி நெடுந் தேர் . . . . [05]

வாராதுஆயினும், வருவது போலச்
செவிமுதல் இசைக்கும் அரவமொடு
துயில் துறந்தனவால் - தோழி! - என் கண்ணே.

பொருளுரை:

தோழி! முழவினைப்போன்ற அடி மரத்தையுடைய வளைந்த நிலையையுடைய பனையினது கொழுவிய ஓலையின் கண்ணே இயற்றிய சிறிய சுள்ளிகளாலாகிய கூட்டிலுள்ள கரிய காலையுடைய அன்றிலினது விருப்பத்தையுடைய முதல்சூலினால் உண்டான நோயையுடைய பெண் பறவை ஆண்பறவையை அழைக்கின்ற பாதியிரவில் தனது சக்கரத்தால்மன்றத்தைப் பிளந்து கொண்டு வரும் தொகுதியாகிய மணியையுடைய தலைவனது நெடியதேர் வாராதாயினும்! வருவது போல! காதினிடத்து ஒலிக்கும் ஒலியினால் என்னுடைய கண்கள் தூக்கத்தை நீத்தன.

முடிபு:

தோழி, கங்குலில் தேர் வாராதாயினும் வருவது போல இசைக்கும் அரவமொடு என் கண் துயில் துறந்தன.

கருத்து:

தலைவன் வரவை எதிர்பார்த்துத் துயின்றிலேன்.

முந்தைய பாடல் அடுத்த பாடல் மேலும்...